Job description
Kua tata ki te rua ngahuru tau a Te Papa Tongarewa hei whakaruruhau, hei kaitiaki mō te mana taonga ā-motu o Aotearoa. Ko te hiringa, ko te tikanga rua te tūāpapa o tēnei pātaka iringa kōrero – koia i ihutahi ai te hapori whānui ki ōna tikanga maha, koia i whanake ai ngā taonga me ngā kōrero tuku iho kia rangona te ihi, te wehi me te wana. Ka tere tēnei waka uta ki te taonga i ngā wai tuku kiri o Aotearoa, ka aro whakamuri ki te au o te waka, ka aro whakaroto o te waka, ka aro whakamua ki ngā tai e papaki mai ana. Kua oti kē tēnei whare taonga te waihanga, nāna i para te huarahi, he kaupapa hou tonu, he motuhake ki tēnei whenua.
Kāore he tūranga e rite ki tēnei. Ko tā te Tumu Tuarua he kaiārahi i Ngā Manu Atarau, he mahi ngātahi me te Kaihautū puta noa i Te Papa Tongarewa. Ko te mahi nui hei kāpehu tohutohu i te aronga o te rautaki mō ngā taonga me ngā kōrero, kia mārama, kia ahurei, kia whai mana te whakaaturanga ki te ao nui tonu.
Ka aro atu tō kāhui ki a koe hei tauira whakaawe, e āhei ai rātou ki te tūhonohono atu ki ngā iwi o te motu. Me whai tikanga te tiaki i ngā kohinga taonga, me ngākau Māori te hono ki ngā iwi puta noa i te motu. I a koe e manutaki ana ka puāwai tō kāhui. Mā te mahi ngātahi kōrua ko te Kaihautū tētahi kākahu e whatu, hei kahu whakamarumaru i Te Papa; ko te mana taonga tana kaupapa, koia anō hei tūāpapa mō tēnei whare taonga. Ka whakaputaina ō pūkenga whakawhanaunga i āu mahi matua, he tūhonohono ki ngā iwi, ki ērā atu umanga Kāwanatanga, ki ngā umanga taonga tuku iho puta noa me Museums Aotearoa hei āwhina i tō kāhui ki te whakatutuki i ā rātou whāinga.
He pou whai tikanga, he manu kōrero Māori, he mōhio koe ki ngā iwi o te motu. He manutaki koe, he kaiwhakaawe, he tauira koe, he kaiakiaki e āhei ana te tō mai i te tino o te tangata, kia mana tonu tana tū. Kua hau te rongo mōu ētahi kaupapa matatini te whakatinana, kua oti kē i a koe ētahi kaupapa hiranga te tūhono atu ki ngā iwi, ki ngā umanga Māori rānei. He manu tiaki koe i te rerekētanga, ā-tangata, ā-taiao rānei. Ki tō tirohanga, whakakōrerohia ngā taonga kia rongo ai te tangata i te ihi, te wehi, te wana, te tapu me te mana.
Kua rite te wā mōu hei kawe mai i ō pūkenga whakahirahira ki tētahi umanga para i te huarahi, kua whakakanohi i te iwi Māori, ana taonga me ana kōrero mai i tana whakatuwheratanga. Ka karapotia koe e ngā taonga o te motu e tūwatawata mai ana, he mahi whakamīharo, he mahi whai hua, he mahi rangatira.
Pēnā kua rite koe ki te kuhu mai ki tētahi o ngā kaupapa nui whakaharahara, whakaawe i Aotearoa me te umanga muhiama puta noa i te ao nui tonu, ka ngākaunui mātou ki te kōrero ki a koe.
