Search
Close this search box.

Job description

Kua tata ki te rua ngahuru tau a Te Papa Tongarewa hei whakaruruhau, hei kaitiaki mō te mana taonga ā-motu o Aotearoa. Ko te hiringa, ko te tikanga rua te tūāpapa o tēnei pātaka iringa kōrero – koia i ihutahi ai te hāpori whānui ki ōna tikanga maha, koia i whanake ai ngā taonga me ngā kōrero tuku iho kia rangona te ihi, te wehi me te wana. Ka tere tēnei waka uta ki te taonga i ngā wai tuku kiri o Aotearoa, ka aro whakamuri ki te au o te waka, ka aro whakaroto o te waka, ka aro whakamua ki ngā tai e papaki mai ana. Kua oti kē tēnei whare taonga te waihanga, nāna i para te huarahi, he kaupapa hou tonu, he motuhake ki tēnei whenua.

Koinei tētahi tūranga e kore tōna rite e kitea anō. Hei Kaiārahi Mātauranga Māori, ko koe kei te urungi o te waka o te Collections, Research and Engagement Directorate e whakawhanake ana i te hiringa mahara, e whakamahere ana i te aronga rautaki mō te Mātauranga Māori. Māu ngā kohinga me ngā whakaaturanga e tiaki.

I te whakahoutanga o Te Papa Tongarewa, ka riro māu tētahi kaupapa whātoro atu i ngā tikanga me ngā taonga tuku iho a te Māori e kōkiri, kia whai wāhi mai hoki ngā kaupapa ako kia Māori, kia whakatōkia ki te papa kia māori. Kei ō ringa te whakahaere whānui i te katoa o tēnei kaupapa whakahou, mai i ngā kaupapa here kohi taonga mai, ki te aromatawai mōrearea, ki te tiaki whakaaturanga, ā, tae atu ki te tiaki kohinga taonga. Kia auau noa tō rangahau takitahi, mā reira e tū ai koe ki te kei o te waka i ngā iarere toi taketake ka puta i te wā. He aronganui kia tōia mai ngā kohinga a Te Papa ki te pātaka matihiko. Ka hangaia e koe tētahi pātaka pāhekoheko, whai hua, hei whakatairanga i te wāhi o Te Papa Tongarewa ki te ipurangi. Māu te kapa ringaraupī e ārahi, whangaia te auahatanga, ō rātou hinengaro hihiko, kia tutuki i a rātou āu rautaki, āu whakaritenga kaupapa.

He mātanga, he pūkenga koe, kāre e kore he tohu kairangi tāu. He rangatira whakaawe, he kaiakopono, ka taea e koe te akiaki tangata kia tene, kia auaha. He hononga mātanga muhiama āu puta noa i te motu ki tarawāhi rā anō e āhei ai koe te toro atu. Kua hau te rongo mōu me āu putanga rangahau whai hua, auaha hoki. Ko koe hei māngai mō Te Papa Tongarewa, māu te hunga whai pānga matua, ngā hononga ā-umanga me te hapori whānui tonu e whakakipakipa kia kōrero mai ki ō ariā, ā, he whakaaturanga, he kaupapa, he kohinga taonga nui whakaharahara puta noa i Aotearoa, ki te ao nui tonu.

Kua rite te wā mōu hei kawe mai i ō pūkenga whakahirahira ki tētahi ūmanga para i te huarahi. Ka rukuhia tēnei puna hōhonu–he mahi whakamīharo, he mahi whai hua, he mahi rangatira.

Pēnā kua rite koe ki te kuhu mai ki tētahi o ngā kaupapa nui whakaharahara, whakaawe i Aotearoa me te umanga muhiama puta noa i te ao nui tonu, ka ngākaunui mātou ki te kōrero ki a koe.

To apply visit the TePapa website.